Mi dissiru

© | Mariella Matera

Mi dissiru ca l’amuri su farfalli
Chi abballanu cu grazia nta lu ventri
Ca é comu u ventu duci e leggeru
Ca non lu vidi ma peró lu senti

Mi dissiru ca l’amuri é magaria
Di Morgana é lu megghju ‘ngannu
Ca é focu ardenti, fiamma viva
Vampa chi vruscia e malu dannu

Ma l’amuri non é vampa
ma acqua di hjiumara
Ca l’acqua astuta u focu
Ma all’acqua cu ripara?

Mi dissiru ca l’amuri é poesia
Paroli muti chi dici u cori
Ca perdi a ragiuni e sentimentu
Perdi la testa, ca u cori voli!

Io dicu ca l’amuri non é nenti
E non é nenti chiju chi provu pe ttia
Ma É tuttu amuri, du cori a menti
É acqua frisca i l’anima mia!