Poesie in Dialetto Calabrese

Cantau lu gallu

Anno 2011 | Mariella Matera

 

S’avvicinava l’ura d’a cruci,
‘nta l’aria si sentianu li peju vuci:

“a morti Gesù amu è condannatu
vaci facendu lu peju peccatu:
dici ca è lu figghjiu du Patri Eternu
E faci magariji comu l’angelu d’u mpernu”

E chija matri, queta queta, arredu a la culonna,
tremau du duluri quandu fu ditta la cundanna:

“Gesù lu Nazarenu, Re di Giudei annomatu,
allu Golgòta, ‘mpisu ‘ncruci, havi a desseri nchiovatu.

Senza chiantu è ormai Maria,
chi girandu pe’ la via,
vaci u cerca cu fu elettu,
mu faci tri chiova pe’ direttu.

“Pe’ l’amuri du Signuri,
non finiti sti lavuri,
Vi dugnu tutti li mei beni,
ma non portatimi atri peni”

E lu mastru, cu dispaciri
risupundi: “Stu lavuru l’aju a finiri,
pecchì si cacciu a vui stu pisu,
io ‘ncruci vegnu mpisu”

S’arricorda mo’ Maria,
quandu dissi ” accusì sia”,
non accettau sulu l’amuri,
ma dissi “fiat” puru au duluri!

E mentri la spada u cori squarciava
alla testa ai dudici figghji morta appojava.
Non ‘nci bastau chija lama ‘nto pettu,
c mo tradìa puru lu predilettu:
la petra cchiu forti s’havia spaccatu,
quandu a paroli fici peccatu.

“Ma non si tu, ‘nta sta terra stranieru,
chiju chi caminava cu Gesù senteru Senteru?”
E Petru, senza mu penza chi dicia,
rispundiu: “Mai vitti st’omu nta la vita mia!”
N’atra donna, maliziusa, i chija parti passau:
“Non eri  tu cu Gesù?” Ija ‘nci dumandau.

“Vi dissi ca i st’omu non sacciu mancu u nomi!”
Ianu finendu l’uri d’a passioni.

“Eri cu lu Nazzarenu, ti vittu mmenzu ai soi!”
“Donna, non è veru…su sulu fantasii li toi!”

A sti Paroli, Petru mio, u batti u cori si scordau
la Parola i Cristu era chija vera, e ‘nta l’aria u gallu cantau!

‘Nc’icisti: “promettu, su prontu pe’ tia a moriri”,
ma Gesù u sapia ca ‘na potevi manteniri:
“Prima mu canta lu gallu, Petru, frati mio,
tri boti, dirai ca no’ sai cu sugnu io!”

Ti sonanu ‘nta testa comu trona e terramoti,
tu chi dicivi ca l’amavi, u rinnegasti tri voti!
Ma ‘nta l’anima toi, lu randi pentimentu,
Gesù, lo po’ sentiri stu forti sentimentu.
E’ lu Diu di l’amuri, chi pe’ tia è ‘nchiovatu,
cu l’amuri soi la vita toi non havi cchiu peccatu!

Dopu a morti, scigghji a tia, petra preziusa,
mu diventi primu massu di la soi Sposa graziusa.

“Petru mio – nc’ici Cristu- tu, m’ami?”
“Mastru mio, tu lu sai ca ti vogghjiu beni!”

E di novu: “Petru , supra a tuttu, m’ami tu?”
“Ti vogghjiu beni, tu lu sai, oh caru mio Gesù!”

Addipedi Lu Signuri: “Petru caru, beni m’indi voi?”
“N’atra vota mu dumandi? Certu ca t’indi vogghjiu, tu lu sai!”

Non potisti amari Cristu, cu l’amuri chi iju amava a tia
ma pe’ tia ‘nta stu mundu, scigghjiu a megghiu via:

“Veni cu mia, petruzza lucenti,
cunta la Parola mia a tutti li genti,
Diu è amuri, amuri sinceru,
t’ama si si i sta terra oppuru foresteru,
t’ama si ti scordi ca pe’ ttia fu ‘nchiovatu,
t’ama si fai lu peju peccatu.
Tu si Petru, petra pregiata
subba a sta petra fazzu a Chiesia, mia sposa amata!”

Annunci

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...